Бу мақолада рекламани ўзингиз ишга туширишингиз учун керакли босқичларни тартиб билан ёздик. Охирида реклама нархи нимага боғлиқлиги ва буджетни қандай режалаш ҳақида.
Бошлашдан олдин нима керак?
- Профессионал аккаунт — Инстаграм созламаларида аккаунтни “Бизнес” ёки “Муаллиф” турига ўтказинг.
- Фейсбук саҳифа — Инстаграм унга уланган бўлиши керак. Реклама ҳисоби шу орқали ишлайди.
- Тўлов картаси — Мета халқаро тўлов карталарини қабул қилади, одатда Visa ёки Mastercard. Кўп банклар бундай картани, жумладан виртуал картани, тез очиб беради.
- Тайёр профил — реклама босилганда одам профилингизга тушади. Унда нима қилишингиз, нарх ёки нарх ҳақида қандай сўраш мумкинлиги ва ишларингиз кўриниб туриши керак.
1-қадам. Реклама ҳисобини очинг
Мета Business Суите ёки Ads Manager орқали реклама ҳисоби очинг. Валюта ва вақт минтақасини диққат билан танланг: кейин уларни шу ҳисобда ўзгартириб бўлмайди, фақат янги ҳисоб очиш керак бўлади.
Текширинг: ҳисобга ким кириш ҳуқуқига эга? Ҳисоб ва саҳифа эгаси доим бизнес эгаси бўлиши керак. Мутахассисга пароль эмас, роль берилади.
2-қадам. Кампания мақсадини танланг
Бу энг муҳим қарор. Мета сиз сўраган натижани беради:
- Хабарлар — Директга ёзишлари керак бўлса. Хизмат ва маҳсулот сотадиган кўп бизнеслар учун энг мос бошланғич мақсад.
- Лидлар — исм ва телефон рақами билан ариза керак бўлса.
- Трафик ёки сотувлар — сайтга одам ёки сайтдан харид керак бўлса. Сотувни ўлчаш учун сайтда Мета Pixel ўрнатилган бўлиши керак.
- Қамров ва кўришлар — брендни танитиш учун. Бу мақсаддан мурожаат кутманг.
3-қадам. Аудиторияни созланг
Жойлашувдан бошланг: хизматингиз фақат Тошкентда бўлса, рекламани бутун Ўзбекистонга кўрсатиш — пулни совуриш. Кейин ёш ва керак бўлса тил. Қизиқишларни кўп қўшиб, аудиторияни жуда торайтириб юборманг: тизимга тўғри одамни топиш учун жой қолдиринг.
Текширинг: реклама қаерда чиқади? Автоматик жойлашувда реклама Фейсбук ва бошқа жойларда ҳам чиқиши мумкин. Агар сизга фақат Инстаграм керак бўлса, жойлашувни қўлда танланг.
4-қадам. Креатив ва матн тайёрланг
Реклама лентада бошқа постлар орасида чиқади ва одам унга бир-икки сония беради. Биринчи кадрда маҳсулот ва фойда кўринсин. Матнда — аниқ таклиф ва кейинги қадам: “Нархини билиш учун Директга ёзинг”.
Битта эмас, 3–5 та турли креатив тайёрланг: расм, видео, Рилс форматида. Қайси бири яхши ишлашини олдиндан ҳеч ким аниқ билмайди — буни синов кўрсатади.
5-қадам. Буджет ва муддатни белгиланг
Кунлик ёки умумий буджет танланади. Реклама ишга тушгач, ҳар бир реклама тўплами бир неча кунлик ўрганиш босқичидан ўтади. Шу вақтда рекламани ҳар куни ўзгартирманг — натижа барқарорлашмайди.
Текширинг: камида бир ҳафта кутинг, кейин хулоса қилинг. Энг кам натижа берган креативни ўчириб, буджетни яхши ишлаётганига ўтказинг.
6-қадам. Натижани кузатинг
Фақат Ads Manager’даги рақамларга эмас, сотувга қаранг. Ҳар ҳафта оддий жадвал юритинг: қанча пул сарфланди, нечта мурожаат келди, нечтаси сотувга айланди. Шундагина реклама ўзини оқлаяптими ёки йўқми, кўрасиз.
Рекламанинг вазифаси — кўриш ёки лайк эмас, мурожаат ва сотув. Шуни ўлчанг.
Инстаграмда реклама қанча туради?
Бу саволга битта рақам билан жавоб бериб бўлмайди, чунки нарх икки қисмдан иборат.
Биринчиси — реклама буджети. U тўғридан-тўғри Метага тўланади. Метада реклама ауксион орқали сотилади, шунинг учун бир хил натижанинг нархи ҳар хил бўлади. Унга таъсир қилади:
- аудитория ҳажми ва унга қанча бошқа реклама берувчи даъвогарлиги;
- мавсум: байрамлар ва йил охирида рақобат ошади ва реклама қимматлашади;
- креатив сифати: одамларга ёққан реклама арзонроқ кўрсатилади;
- танланган мақсад: мурожаат, кўришдан кўра қимматроқ туради.
Иккинчиси — созлаш ва юритиш хизмати, агар буни мутахассисга топширсангиз. Damar’да таргет реклама хизмати $500 дан бошланади. Унга рақобатчилар рекламаси таҳлили, аудитория ва таклифни аниқлаш, креативлар, кабинет ва Pixel созлаш, A/B тестлар ва мунтазам ҳисобот киради. Реклама буджети алоҳида.
Буджетни режалашда асосий қоида: у бир нечта креативни синаб кўриш ва камида бир ҳафта натижа йиғиш учун етарли бўлсин. Жуда кичик буджет билан тизим ўрганиб улгурмайди ва сиз “реклама ишламайди” деган нотўғри хулосага келасиз. Реклама бериб, натижа кўрмаётган бўлсангиз, рекламадан мижоз келмаслигининг 7 сабаби ҳақидаги мақоламизни ўқинг.
Рекламани ўзингиз берасизми ёки жамоага топширасизми — биринчи консультация бепул: бизнесингиз учун қайси мақсад ва қандай буджетдан бошлаш кераклигини бирга аниқлаймиз.